Krishna Lahari Stotram – శ్రీ కృష్ణలహరీ స్తోత్రం

కదా వృందారణ్యే విపులయమునాతీరపులినే
చరంతం గోవిందం హలధరసుదామాదిసహితమ్ |
అహో కృష్ణ స్వామిన్ మధురమురళీమోహన విభో
ప్రసీదేతి క్రోశన్నిమిషమివ నేష్యామి దివసాన్ || ౧ ||

కదా కాళిందీయైర్హరిచరణముద్రాంకితతటైః
స్మరన్ గోపీనాథం కమలనయనం సస్మితముఖమ్ |
అహో పూర్ణానందాంబుజవదన భక్తైకలలన
ప్రసీదేతి క్రోశన్నిమిషమివ నేష్యామి దివసాన్ || ౨ ||

కదాచిత్ఖేలంతం వ్రజపరిసరే గోపతనయైః
కుతశ్చిత్సంప్రాప్తం కిమపి లసితం గోపలలనమ్ |
అయే రాధే కిం వా హరసి రసికే కంచుకయుగం
ప్రసీదేతి క్రోశన్నిమిషమివ నేష్యామి దివసాన్ || ౩ ||

కదాచిద్గోపీనాం హసితచకితస్నిగ్ధనయనం
స్థితం గోపీవృందే నటమివ నటంతం సులలితమ్ |
సురాధీశైః సర్వైః స్తుతపదమిదం శ్రీహరిమితి
ప్రసీదేతి క్రోశన్నిమిషమివ నేష్యామి దివసాన్ || ౪ ||

కదాచిత్సచ్ఛాయాశ్రితమభిమహాంతం యదుపతిం
సమాధిస్వచ్ఛాయాంచల ఇవ విలోలైకమకరమ్ |
అయే భక్తోదారాంబుజవదన నందస్య తనయ
ప్రసీదేతి క్రోశన్నిమిషమివ నేష్యామి దివసాన్ || ౫ ||

కదాచిత్కాళింద్యాస్తటతరుకదంబే స్థితమముం
స్మయంతం సాకూతం హృతవసనగోపీసుతపదమ్ |
అహో శక్రానందాంబుజవదన గోవర్ధనధర
ప్రసీదేతి క్రోశన్నిమిషమివ నేష్యామి దివసాన్ || ౬ ||

కదాచిత్కాంతారే విజయసఖమిష్టం నృపసుతం
వదంతం పార్థేతి నృపసుత సఖే బంధురితి చ |
భ్రమంతం విశ్రాంతం శ్రితమురళిమాస్యం హరిమమీ
ప్రసీదేతి క్రోశన్నిమిషమివ నేష్యామి దివసాన్ || ౭ ||

కదా ద్రక్ష్యే పూర్ణం పురుషమమలం పంకజదృశం
అహో విష్ణో యోగిన్ రసికమురళీమోహన విభో |
దయాం కర్తుం దీనే పరమకరుణాబ్ధే సముచితం
ప్రసీదేతి క్రోశన్నిమిషమివ నేష్యామి దివసాన్ || ౮ ||

ఇతి శ్రీవాసుదేవానందసరస్వతీ కృత శ్రీ కృష్ణ లహరీ స్తోత్రమ్ ||

మరిన్ని శ్రీ కృష్ణ స్తోత్రాలు పరిశీలించండి.