Sri Krishna Chandra Ashtakam – శ్రీ కృష్ణచంద్రాష్టకం

మహానీలమేఘాతిభవ్యం సుహాసం
శివబ్రహ్మదేవాదిభిః సంస్తుతం చ |
రమామందిరం దేవనందాపదాహం
భజే రాధికావల్లభం కృష్ణచంద్రమ్ || ౧ ||

రసం వేదవేదాంతవేద్యం దురాపం
సుగమ్యం తదీయాదిభిర్దానవఘ్నమ్ |
చలత్కుండలం సోమవంశప్రదీపం
భజే రాధికావల్లభం కృష్ణచంద్రమ్ || ౨ ||

యశోదాదిసంలాలితం పూర్ణకామం
దృశో రంజనం ప్రాకృతస్థస్వరూపమ్ |
దినాంతే సమాయాంతమేకాంతభక్తై-
-ర్భజే రాధికావల్లభం కృష్ణచంద్రమ్ || ౩ ||

కృపాదృష్టిసంపాతసిక్తస్వకుంజం
తదంతఃస్థితస్వీయసమ్యగ్దశాదమ్ |
పునస్తత్ర తైః సత్కృతైకాంతలీలం
భజే రాధికావల్లభం కృష్ణచంద్రమ్ || ౪ ||

గృహే గోపికాభిర్ధృతే చౌర్యకాలే
తదక్ష్ణోశ్చ నిక్షిప్య దుగ్ధం చలంతమ్ |
తదా తద్వియోగాదిసంపత్తికారం
భజే రాధికావల్లభం కృష్ణచంద్రమ్ || ౫ ||

చలత్కౌస్తుభవ్యాప్తవక్షఃప్రదేశం
మహావైజయంతీలసత్పాదయుగ్మమ్ |
సుకస్తూరికాదీప్తభాలప్రదేశం
భజే రాధికావల్లభం కృష్ణచంద్రమ్ || ౬ ||

గవాం దోహనే దృష్టరాధాముఖాబ్జం
తదానీం చ తన్మేలనవ్యగ్రచిత్తమ్ |
సముత్పన్నతన్మానసైకాంతభావం
భజే రాధికావల్లభం కృష్ణచంద్రమ్ || ౭ ||

అదః కృష్ణచంద్రాష్టకం ప్రేమయుక్తః
పఠేత్కృష్ణసాన్నిధ్యమాప్నోతి నిత్యమ్ |
కలౌ యః స సంసారదుఃఖాతిరిక్తం
ప్రయాత్యేవ విష్ణోః పదం నిర్భయం తత్ || ౮ ||

ఇతి శ్రీరఘునాథప్రభు విరచితం శ్రీ కృష్ణచంద్రాష్టకమ్ ||

మరిన్ని శ్రీ కృష్ణ స్తోత్రాలు పరిశీలించండి.